Pakhat le pakhat I upat hna uh sih

               A cung lei ka bia tlangtar ban tuk in, lai mi kan thinlung ah ngeih awk le si ve uh sih ti ka duh mi cu, Pathat le Pakhat hi I upat hna uh sih ti hi si. Kan mah le kan mah kan I upat lo ruang ah midang mi phun hna nih kan laimi an kan upat khawh lonak bik a si tiin kei ka hmuih ning a si.

Tih khi Upat a si lo

Upat timi hi tih he cun a dang ngai te, Lai mi kan ruah nak ah Upat kan ti tik ah hin tih nak hi kan mit thlam ah a cuang tawn zei caah ti ah cun kan nu le kan pa hna nih hin fa le an kan chimh hrin tik ah kan tih hna she tiin an kan (tlerh)chimh hrin tawn, cu lawng si lo in kan sianginn kai nak saya/mah tenih an kan chimh hrin tik ah kan tih hna she tiin an kan tlerh tawn cu ruang ah Upat timi hi tih ah kan ruah sual tawn. Kan nih laimi cu kan saya/mah le kan nu le kan pa hna he um thut dir le lung khat bia ruah ding ah kan tih hna, mah cu kan upat rua hna tiin kan ruah tawn. A si nain mah hi cu upat si lo in tih tu a rak si.

Upatnak ti mi cu kan tuah/tuan mi cung ah a tha I tuah/tuan khawhnak le thiamnak a ngeih mi cung ah theih thiam piak le hngalh piak/ hmuih piak khawh, I upat nak pek khi a si. Mi nung nih hin a mah le si tawk tein tuah(tuan) khawh mi ngeih cio a si. Kan thil ti khawh nak hi a dang cio ban tuk in kan tuah khawh nak cio cung ah khan Pakhat le pakhat upatnak, I hngalh piaknak, theih thiam piak le hmuih thiam hi a herh bik mi asi.

A kan dawn tu thil hna

(1)   Keimah tinak thinlung ( kan Hawi I an tuah mi tuan mi kha zei I rel piak lo I, kei mah tuah/tuan mi hi a si (dik) bik ti I, Hawi tuan/tuan mi kha zei rel piak lo).

(2)   Nihsawhnak thinlung ( Hawi nih an tuah mi thil ah, a mah pa/nu tuah/taun mi te hna cu ti I, that nak hmuih piak lo in nihsawh zumh teih nak thinlung).

(3)   Zeirel lo

(4)   I uahnak thinlung

(5)   Hawi thatnak hmuih khawh lo

Hi bantuk thinlung/ruahnak kan ngeih chung hi cu kan hawi le cung ah upatnak thinlung kan ngei kho lai lo. Pakhat le pakhat upatnak thin lung kan ngeih lo chung poh hi cu kan khua le ram than chonak ah donkhan tu kan si.

Ngeihawk ah Herhmi thinglung

Thatnak tuahmi kha I hmuih thim piak

Kan tuah/tuan mi kha a thatnak lei kam in I hmuih thiam piak hi a herh ngai mi a si. Kan I hmuih thiam piak khawh nak caah a herh ngai mi thinlung cu dawtnak a si. Dawtnak kan ngei lo sicun zeiban tuk hmenh a tha lei in kan I hmui piak kho lai lo I a chiat nak lei lawng kan hmuih khawh lai. Thatnak kan tuah/tuan mi ah khan thazang I pek le hmai fandeuh nak ah forhfial hi a bia pi ngai mi si fawn. Thiltha tuah mi kha thazang kan vapek lo le forhfial nak hna kan chim lo ah cun a tuah mi kha a that le that lo a thei kho ve lai lo. Curuangah thazang pek le I forhfial hi a hauih nak asi.

I cawisang hna uh sih

                        Mah pakhat le pakhat I Cawisang hi laimi kan nun ah a bau ngai rua tiin ka hmuih, kan hawi nih rian an tuan mi, an thiamnak, an fimnak, etc… mah pawl ah khan hmaizahnak upat pek ding a si. A tu kan laimi chung ah upat pek awk tlak mi tampi upatnak kan pek lo mi hna an tam ngai te. A biana ah hla phuah thiam, hlasak thiam, fim thiamnak, ram caah thatnak a tuahmi etc… mah hna pawl hi upatnak pek lo mi an tam pi I, an tuah/tuan mi hna kan theih piak hna lo mi zong an tam, mah cu zei ruang ah si ti ah cun kan pawngkam um mi pakhat le pakhat kan I cawisang hna lo ruang ah a si. Mi nungpakhat kha thannak lam a penh cuahmah I hi ti ka bawmh ah cun mi ah, aa chuah lai ti kan thei ko nain, kan bawm duh tawn hna lo. An kan tei lai tu kha kan phan I kan rial dipchih tawn hna, Hibantuk zawn ah hin a tu kan pa a si mi Dr. Dennis nun zia hi ka uar ngai mi a si. A mah pawngkam ah a um mi a fa le pawl hi an mah le sikhawh tawk cio te in a cawi san hna, a si khawh tawk in a zohkhenh hna I a bawmhchanh hna, a mah thinlung ngeihmi ka hmuih mi ah, kan lai mi nih hi ban tuk thin lung ngeihi kan herh ngai mi a si. Pakhat le pakhat thatnak kan tuahmi kha I hmuihpiak thiam hna uh sih law, pakhat le pakhat kan tuah/tuan mi ah I cawisang hna sih. Cuthinlung nih cun pakhat le pakhat i upat khawh nak thinlung a kan pek lai.